النية زاملت سيدها/محمد جيب الله كدكى
أم سر حليلة حاج نصر أبواتهم الاتنين أشقا
ولاسعين وراضعين من شطر
وبقولوا وكتين عرسا أكبر عليه عفر وغفر
لكن في شان بت عمو بس مجبور عليها يعرسا
وزول غيرو ما بجي بالجبر
مرق 13 سنه قاعدين وما جابوا الجنا
وبقوا غايتو يجروا هنا وهناك للفقرا خايفين العقر
مرات مشيهم بالحمير ومرات مشيهم بالكدر
يا شيخنا أمسك دا البياض يومن نجيب جنا ليك نذر
جنبك نجيبو نزينو ونديك شوالين تمر
مع انو معروف الجنا شيْ قسمه في أيد ربنا
الشوق وحسن النية بس نساهم انو دا شيتا كفر
وكتين خلاص عدمو الصبر
قالتلو عرس يبقي تلقالك وليد ينفعنا بعدين في الكبر
وفعلا مشي وعرس بنية شيخ بدر
وفي غفلة والأيام تمر
أم سر بقت من عنقريب مفروش فرش لي عنقريب قاطع برش
كرعينا ماتن ووقعت في الدراب قرش
تاريها حامل ودا الوحم شايفاه ذاتو كتر كتر
وبالليل وكت تمرق علي الجيران تطل تلقاها تقدل بالعصا
والشال كمان من فوق رأسه طيرة فقر
وبت شيخ بدر
كانت معاها حنين منين وآخر شكر
شالت وشيها بلا سبب وعيونه انقلبن حمر
الغيرة جاته وجاها ضر خلاها زى إلفي الجمر
طوالي تتمدد تنوم ضل الصباح يكمل تشيل ضل العصر
أم سر مبيضه نيتا ما قصرت في خدمتا
مسكينة شايله كريشتا كم سوت الشاي والأكل
وقامت محصلا حاج نصر أندلي باقي مع الفجر
قراع تحت وعرقان يخر
وطوريته هبرت فوق كراعه واخدت شويه من الضفر
والدم نزل ساكت يشر
من عبه يمرق في السعوط مهجومه جات أم سر تجوط
عين الحسود يا خيري كر صابحت ليك زولا فقر
كدي غسل أيديك ديل وهاك وتبت ضمة الريق قفاك
ودخلن عيونك في جحر
والشاي دا ذاتو خلاص قرض ما شفت كيف بقي عرقو مر
وساعة فطر وكبه وشرب أدشي باااااع
قالتلو زين يا يابا زين عافيه وأجر
شالت مواعينا ومشت
الجدول القراع رماها وكوركت ألحقني يا دا 00 ألحقني يا دا
وجيب لي سعفات خدر وحصلني بالبيت من قبل
وداية الفريق بت أبكر
أنا دابي لي سبعه شهور وود سبعه قالوا طويل عمر
أنا داير ألد ( يا الله لي 00 يا الله لي ) الليلة يا سابل الستر
وداها لي بيتها وجري وفي أيده جاب الدايه جا
ومع رمية الضل وقريب وقت الضهر قج الزغاريد في البلد
والجاري يجري علي نصر يا حاج نصر جيب البشارة بلا نكد
مبروك عليك جابت ولد
يتربي في عزك بخيت انشاءالله زى ليلة القدر
انشاءالله حضرت الاسم
قال بي فرح وقرب يطير بالحيل علي حضرته خير
طبعا أسم جدي الكبير
في موقعة كورتي وصبير أول شهيد كان بابكر
شايل اسمه ولدي الجاني دا والرحمة لي داك في القبر
حاشية
( قديما قالوا : المرأة العظيمة هي هدية الخالق لمن يقترن بها )
مع أمنيـــــــــــــــــــــــــــاتي
موضوع: النيه زاملت سيدها 
2009-01-25, 7:00 am
